གཞན་གྱིས་འབྲོང་ཆུང་དངོས་གྲུབ་སྐོར་ཅི་བཤད་ཀློག

བཀའ་ཟུར་འབྲོང་ཆུང་དངོས་གྲུབ་ནི། བཙན་བྱོལ་གཞུང་གི་ནང་གཞུང་ཞབས་ལས་བྱེད་ཐེག་པ་རིམ་འཛེགས་ཀྱིས་མི་ལོ་ཧྲིལ་པོ་བཞི་བཅུ་བརྒལ་བའི་སྲི་ཞུའི་ཞབས་འདེགས་སྒྲུབ་མཁན་ཕྲན་རྣམས་གཅིག་མཚུངས་ཆགས་ཡོད་པས། ཞབས་ཞུའི་རིང་ལྷག་བསམ་དང་། ལར་རྒྱ་སོགས་ཡིད་ཆེས་བྱ་འོས་ཀྱི་དཔང་རྟགས་བཙན་བྱོལ་གཞུང་གི་ལས་ཁུངས་དང་། མང་ཚོགས་ཀྱི་ངོས་སུ་ས་རིས་ཐང་གསལ་ལྟར་བཞག་ཡོད་ན། འདིར་རྒྱས་བཤད་ཞུ་མ་དགོས་པར་ཚང་མས་ཐུགས་ལ་ལྷང་ངེར་མངའ་ཡོད་པའི་རེ་བ་བྱེད་བཞིན་ཡོད། གོང་གསལ་རྒྱུ་མཚན་ཡང་དག་ལ་བརྟེན་ད་རེས་ཀྱི་སྲིད་སྐྱོང་འོས་མིའི་ཁོངས་ནས་ཕྲན་གྱིས་བཀའ་ཟུར་འབྲོང་ཆུང་དངོས་གྲུབ་མཆོག་ལ་རྒྱབ་སྐྱོར་ཞུ་རྒྱུ་ཡིན།
ཚེ་་རིང་དོན་གྲུབ།

ཁྲིམས་ཞིབ་པ་གཞན་ཟུར་པ།

བཀའ་ཟུར་འབྲོང་ཆུང་དངོས་གྲུབ་མཆོག་ནས་བོད་གཞུང་དང་བོད་མིའི་སྒྲིག་འཛུགས་ནང་ཐེག་པ་རིམ་འཛེགས་དང་། དེ་འབྲེལ་ཤེས་མྱོང་ཇི་ལྡན་དང་། སྐབས་སོ་སོར་འགན་དབང་ཕྱག་བཞེས་གནང་ཕྱོགས། ཁྲིམས་སྒྲིག་ཁག་ལ་སྲུང་བརྩི། སྐུ་ངོ་མཆོག་གི་བཟང་སྤྱོད་གཙོ་བོར་གྱུར་བའི་སྤྱི་ཡོངས་ཀྱི་མི་གཤིས་བཅས་ལ་བརྟེན་གུས་ནས་ཁོང་ལ་ ༢༠༢༡ ལོའི་སྲིད་སྐྱོང་དུ་སྙིང་ཐག་པ་ནས་རྒྱབ་སྐྱོར་ཞུ་བ་དང་སྦྲགས་འོས་འཕེན་པ་གང་མང་ནས་ཁོང་ལ་རྒྱབ་སྐྱོར་ཡོང་བའི་འབོད་སྐུལ་ཡང་ཞུ་རྒྱུ་ཡིན།
བཀའ་བརྒྱུད་དོན་གྲུབ།

ཁྲིམས་ཞིབ་པ་ཆེ་བ་ཟུར་པ།

གུས་ཟུང་ནས་བཀའ་ཟུར་འབྲོོང་ཆུང་དངོས་གྲུབ་ལགས་ ༢༠༢༡ ལོའི་སྲིད་སྐྱོང་དུ་རྒྱབ་སྐྱོར་ཞུ་རྒྱུའི་གསལ་བསྒྲགས་ཞུ་རྒྱུ་དང་། ཆབས་ཅིག་འོས་མི་གཞན་རྣམས་ལ་ཐུགས་རྗེ་ཆེ་ཞུ་གི་ཡོད།

མཁའ་འགྲོ་ཕྱག་མཛོད་ཚང་།

མ་སུ་རི་བོད་ཁྱིམ་དབུ་འཛིན་ཟུར་པ་དང་། བོད་མིའི་སྒྲིག་འཛུགས་ཀྱི་དྲུང་ཆེ་ཟུར་པ། ཨ་རིའི་ཡུ་ཀྲ་མངའ་སྡེ།

རང་ངོས་ནས་ ༢༠༢༡ ལོའི་སྲིད་སྐྱོང་དེ་བཀའ་ཟུར་འབྲོང་ཆུང་དངོས་གྲུབ་མཆོག་ལ་རྒྱབ་སྐྱོར་ཞུ་གི་ཡོད། དེའི་རྒྱུ་མཚན་ནི། ཁོང་གིས་ལོ་མང་རིང་བདེ་སྲུང་ལས་ཁུངས་སུ་ཐེམ་པ་རིམ་འཛེགས་ཀྱིས་མཐར་བཀའ་བློན་བར་ཞབས་ཞུ་གནང་རིང་བདེ་སྲུང་ལས་ཁུངས་མ་ལག་དང་བཅས་པའི་ལས་བྱེད་གསོ་སྐྱོང་གནང་སྟངས་དེ་ཡིད་སྨོན་སྐྱེ་དགོས་པ་ཞིག་ཡོད་པ་མ་ཟད། ལྷག་པར་དུ་ཁོང་ལ་བདེ་སྲུང་ལས་ཁུངས་ཁྱོན་ཡོངས་ཧ་ཅང་ཚགས་ཚུད་བཟོས་གནང་ཐུབ་པའི་ནུས་པ་ལྡན་པ་དེ་རང་གི་ཐོག་ནས། ཁོང་གིས་བོད་མིའི་སྒྲིག་འཛུགས་དང་བོད་པའི་སྤྱི་ཚོགས་ཀྱང་ཚགས་ཚུད་བཟོ་ཐུབ་ཀྱི་རེད་བསམ་སྟེ། འབྲོང་ཆུང་དངོས་གྲུབ་ལགས་ ༢༠༢༡ ལོའི་སྲིད་སྐྱོང་དུ་རྒྱབ་སྐྱོར་ཞུ་གི་ཡོད།
ཐུབ་བསྟན་བསམ་འཕེལ།

བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟུར་པ་དང་བོད་མིའི་སྒྲིག་འཛུགས་ཀྱི་དྲུང་ཆེ་ཟུར་པ། སྦེལ་བ་ཀོབ་སྦིལ། རྒྱ་གར།

སྐུ་ངོ་འབྲོང་ཆུང་དངོས་གྲུབ་ལགས་ཀྱིས་ཐེངས་དང་པོར་གུས་མོར་ཁམས་བདེའི་འཚམས་འདྲི་གནང་སྐབས། ཁོང་ནི་བབ་བརླིང་བརྟན་གསུམ་ལྡན་པའི་གང་ཟག་ཅིག་ཡིན་པའི་ཚོར་སྣང་དམིགས་བསལ་ཞིག་བྱུང་ཞིང་། རྗེས་སུ་གནས་སྟངས་ཤིག་གི་ཐོག་ནས་ཁོང་དང་རིམ་པས་འབྲེལ་བ་བྱུང་བའི་བརྒྱུད་རིམ་ལ་གཞིགས་ན། ཁོང་ནི་དཔོན་ཉམས་མེད་པར་འབྲེལ་བ་ཞུ་བདེ་པོ་དང་། གཞན་གྱིས་བསམ་ཚུལ་ལ་ཐུགས་སྣང་ཆེན་པོས་གསན་བཞེས་གནང་མཁན། བཀའ་ལན་ཁག་དུས་ཐོག་ཏུ་གནང་མཁན་གྱི་དབུ་ཁྲིད་ཅིག་ཡིན་པ་ཤེས་རྟོགས་བྱུང་།
ཕུན་ཚོགས་ཉི་སྒྲོན།

ཆབ་སྲིད་བཙོན་ཟུར་དང་། ཕྱི་ལོ་ ༡༩༩༥ ལོའི་རི་སྦོག་འགྲོ་བ་མིའི་ཐོབ་ཐང་གི་གཟེངས་རྟགས་བཞེས་མཁན། སུད་སི་ཛུལ་རིག

བཀའ་ཟུར་འབྲོང་ཆུང་དངོས་གྲུབ་ལགས་ ༢༠༢༡ ལོའི་སྲིད་སྐྱོང་དུ་ཕེབས་རྒྱུར་གུས་པས་རྒྱབ་སྐྱོར་ཞུ་གི་ཡོད།

ཐུབ་བསྟན་ལུང་རིགས།

བཀའ་ཟུར་དང་། བོད་མང་སྤྱི་འཐུས་ཚོགས་གཙོ་གཞོན་པ། རྡ་རམ་ས་ལ་རྒྱ་གར།

བོད་མིའི་སྒྲིག་འཛུགས་ནང་ལོ་ཤས་ཞབས་ཞུ་བསྒྲུབས་པའི་བརྒྱུད་རིམ་ནང་བཀའ་ཟུར་འབྲོང་ཆུང་དངོས་གྲུབ་མཆོག་གི་ཐད་ཀར་བཀོད་ཁྱབ་འོག་ལས་དོན་ཞུས་མེད་ཀྱང་། རང་ཉིད་ཀྱི་མཐོང་ཚུལ་ལ་བཀའ་ཟུར་འབྲོང་ཆུང་དངོས་གྲུབ་མཆོག་ནི་ལྟ་གྲུབ་དང་ལངས་ཕྱོགས་བརྟན་པོ་ཡོད་པའི་ཉམས་མྱོང་ཅན་གྱི་མི་སྣ་ཞིག་ཡིན་པ་དང་། མི་ཆེ་ཆུང་སུ་འདྲ་ཞིག་དང་ཐུག་ནའང་ཕྱོགས་ཞེན་དང་ཉེ་རིང་གི་ཕྱོགས་སུ་མ་ལྷུང་བར་གཟིགས་ཕྱོགས་གཅིག་འགྱུར་ཡིན། ཁོང་ནི་བོད་མིའི་སྒྲིག་འཛུགས་ནང་ཤིན་ཏུ་ཉམས་མྱོང་ཅན་དང་ལས་དོན་གང་ཅིའི་ཐད་རྒྱུས་མངའ་ཡོད་པའི་མི་སྣ་ཞིག་ཡིན། ད་རེས་ཁོང་ནི་ཕྲན་གྱི་ ༢༠༢༡ ལོའི་སྲིད་སྐྱོང་འོས་མི་འོས་ཤོས་དེ་ཡིན།
སྐལ་བཟང་མགོན་པོ།

བོད་མིའི་སྒྲིག་འཛུགས་ཀྱི་དྲུང་གཞོན་ཟུར་པ། ཨ་རིའི་གྲོང་ཁྱེར་ནིའུ་ཡོག

གུས་པ་ཆེས་མཐོའི་ཁྲིམས་པ་ཟུར་བ་ཆུ་སྟེང་ངག་དབང་ཐུབ་བསྟན་གྱིས་མིའི་སྒྲིག་འཛུགས་ནང་ལོ་མང་སྲི་ཞུ་སྒྲུབ་མྱོང་བའི་ཆ་ནས་སྐུ་ངོ་བཀའ་ཟུར་འབྲོང་ཆུང་དངོས་གྲུབ་མཆོག་གི་ལོ་རྒྱུས་དང་། ཁྱད་ཆོས་རྣམས་ཆ་ཚང་རྒྱུས་མངའ་ཡོད། དཔེར་ན། སྐུ་ངོ་མཆོག་གི་རྒྱུན་གཏན་ནས་ཐུགས་གཤིས་ཀུན་སྤྱོད་བཟང་བ། ལྷག་བསམ་དྲང་ཚུགས་ལྡན་པ། ཤེས་འཇོན་གཉིས་ལྡན། ཆབ་སྲིད་ལང་ཕྱོགས་བརྟན་པ། འཛིན་སྐྱོང་གི་ཉམས་མྱོང་དང་ཕྱི་ནང་འབྲེལ་ལམ་ཟབ་པ། མཐོ་དམན་བར་གསུམ་ལ་བསྟུན་མཁས་ཟབ་པ། གཞིས་བྱེས་བོད་མི་མང་པོས་ཡིད་ཆེས་ཞུ་ཡུལ། ལྷག་པར་༧གོང་ས་མཆོག་གི་སྐུའི་ཉེན་སྲུང་ཐོག་ལ་འཐུས་ཤོར་བཏང་མེད་པ། དེ་བཞིན་ལྐོག་ཟ་རུལ་སུངས་སོགས་ཀྱི་གནས་རྙོག་མེད་པའི་གཙང་མ་ཞིག་ཡིན་པས་ཁོང་ལ་སྲིད་སྐྱོང་གི་འོས་ཆོས་མཐའ་དག་ཚང་ཡོད་སྟབས་གུས་པས་བཀའ་ཟུར་འབྲོང་ཆུང་དངོས་གྲུབ་མཆོག་ ༢༠༢༡ ལོའི་སྲིད་སྐྱོང་ལ་རྒྱབ་སྐྱོར་ཞུ་ཡི་ཡོད།”

ཆུ་སྟེང་ངག་དབང་ཐུབ་བསྟན།

བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་པ་ཟུར་པ། ཀ་ལི་ཕོ་ནི་ཡ། ཨ་རི།

བཀའ་ཟུར་འབྲོང་ཆུང་དངོས་གྲུབ་མཆོག་ཡུན་རིང་བོད་ནང་འབྲེལ་བ་ཧ་ཅང་ཟབ་པ་དང་། བོད་ནང་ཞུགས་མཁན་ཚོས་ཀྱང་ཁོང་ལ་དུས་ད་ལྟ་ཡང་ཡིད་ཆེས་ཆེན་པོ་གནང་བཞིན་ཡོད་སྟབས། བོད་ནང་ལོགས་ཀྱི་གནས་སྟངས་ལ་ཐུགས་རྒྱུས་ཆེ་བ་དང་། མི་ལོ་བཞི་བཅུ་ལྷག་ཙམ་གྱི་འཛིན་སྐྱོང་ཉམས་མྱོང་ལྡན་པ། སྐུ་ཕྱྭར་ཉེན་ཁ་ཡོད་པའི་གནས་ཚུལ་ལ་གདོང་ལེན་བྱེད་མཁས་པ། བོད་ཀྱི་ཞི་མོལ་ལས་དོན་གྱི་སྔ་ཕྱིའི་གནས་ཚུལ་ཆ་ཚང་ལ་རྒྱུས་མངའ་ཟབ་པ་བཅས་ལ་བརྟེན་ནས་འབྲོང་ཆུང་དངོས་གྲུབ་ལགས་ཉེར་གཅིག་སྲིད་སྐྱོང་དུ་རྒྱབ་སྐྱོར་ཞུ་གི་ཡོད།

ངག་དབང་འོད་འབར།

ཆབ་སྲིད་བཙོན་ཟུར་དང་། བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་ཟུར་པ། རྡ་རམ་ས་ལ། རྒྱ་གར།

ངས་ཉེར་གཅིག་སྲིད་སྐྱོང་དེ་བཀའ་ཟུར་འབྲོང་ཆུང་དངོས་གྲུབ་མཆོག་ལ་རྒྱུ་མཚན་བཞིའི་ཐོག་ནས་རྒྱབ་སྐྱོར་ཞུ་གི་ཡོད། ཤེས་འཇོན་གཉིན་ལྡན་དང་ལྷག་བསམ་དྲང་ཚུགས་ལྡན་པ། ༧གོང་ས་མཆོག་ནས་སྐུ་ངལ་འཛེམས་མེད་ངང་བཙུགས་གནང་བའི་བོད་གཞུང་གི་དཀྱིལ་འཁོར་ནང་མི་ལོ་བཞི་བཅུ་ལྷག་ཙམ་ཕྱག་ལས་གནང་བའི་ཉམས་མྱོང་ཕུན་སུམ་ཚོགས་པ། གཞིས་བྱེས་གཉིས་ཀྱི་བོད་མིའི་མངོན་འདོད་གང་ཡིན་གསལ་པོ་ཤེས་པའི་གདེང་སྤོབས་ཚད་ལྡན་ཡོད་པ། འདས་པའི་མི་ལོ་བཞི་བཅུ་ལྷག་བཙན་བྱོལ་སྤྱི་ཚོགས་ནང་ཞབས་ཞུ་བསྒྲུབས་པའི་དུས་ཡུན་དེ་དག་ནང་༧གོང་ས་༧སྐྱབས་མགོན་ཆེན་པོ་མཆོག་ཐུགས་ཕམ་ཡོང་གཞིའི་རིགས་ཀྱི་ནག་ཐིག་སོགས་གང་ཡང་མེད་པའི་གནད་དོན་དེ་དག་ལ་བརྟེན་ནས་ངས་ཁོང་ལ་རྒྱབ་སྐྱོར་ཞུ་གི་ཡོད།
ངག་དབང་བདེ་ལེགས།

ཆབ་སྲིད་བཙོན་ཟུར་དང་། ལྟ་གྲུབ་དགེ་རྒན། རྡ་རམ་ས་ལ། རྒྱ་གར།

བཀའ་ཟུར་འབྲོང་ཆུང་དངོས་གྲུབ་ལགས་ ༢༠༢༡ ལོའི་སྲིད་སྐྱོང་དུ་ཕེབས་རྒྱུར་གུས་མོས་རྒྱབ་སྐྱོར་ཞུ་གི་ཡོད། 

སྟག་ལྷ་སྐལ་བཟང་དབྱངས་སྐྱིད།

བཀའ་བློན་ཟུར་པ། ལོན་ཌོན། དབྱིན་ཡུལ།

འབྲོང་ཆུང་དངོས་གྲུབ་མཆོག་ནི་བོད་ཀྱི་རྩ་དོན་ཕྲལ་ཕུགས་རྒྱང་གསུམ་ལ་བབས་ལྷིང་བརྟན་གསུམ་གྱི་ངང་ཕྱག་བསྟར་གནང་མཁན་དང་། ཡུལ་མི་མཐོ་དམན་བར་གསུམ་ལ་དབྱེ་བ་མེད་པ་གཅིག་མཚུངས་གཟིགས་སྐྱོང་གནང་མཁན། མདོ་དབུས་ཁམས་གསུམ་གོང་བུ་གཅིག་ཏུ་སྒྲིལ་རྒྱུའི་ནུས་པ་དང་ལྡན་པ། ལྷག་པར་༧རྒྱལ་བ་དོན་གྱི་བདག་པོའི་བཀའ་དགོངས་ཐོག་ཐང་ལྷོད་མེད་པར་ཤར་བསྐྱོད་གནང་མཁན་སྲིད་སྐྱོང་ཚད་ལྡན་ཞིག་ཆགས་རྒྱུར་དོན་མི་ཟ།

རིན་ཆེན་ཚེ་རིང་།

སྐད་ཡིག་སྣེ་མང་མཁྱེན་མཁན་ལམ་ལྷོང་ཅན་གྱི་ཚོང་པ། ཀལ་མན་ཌོན། རྒྱ་གར།

བཀའ་ཟུར་འབྲོང་ཆུང་དངོས་གྲུབ་ནི་རྒྱ་ནག་དམར་གཞུང་གིས་ཀྱང་གནད་འགག་ཅན་གྱི་མི་སྣ་ཞིག་ལ་ངོས་འཛིན་བྱེད་བཞིན་པ་དང་། ཁོང་ནི་མ་ཤེས་ཤེས་མདོག་ཙམ་མིན་པར་བོད་ཕྱི་ནང་གཉིས་ལ་རྒྱུས་མངའ་ཆེ་ཤོས་ཀྱི་དབུ་ཁྲིད་ཅིག་ཡིན།

མགོ་ལོག་འཇིགས་མེད་རྒྱ་མཚོ།

ཆབ་སྲིད་བཙོན་ཟུར། ཛུལ་རིག སུད་སི།

གུས་པ་རང་ཉིད་བདེ་སྲུང་ལས་ཁུངས་ནང་མི་ལོ་བཅུ་ཙམ་རིང་བཀའ་ཟུར་འབྲོང་ཆུང་དངོས་གྲུབ་མཆོག་དང་ལྷན་ཞབས་ཞུའི་གོ་སྐབས་ཀྱི་ཉམས་མྱོང་ལས་ཁོང་ནི། ལྷག་བསམ། ཤེས་འཇོན། རྒན་གཞོན་མཐོ་དམན་ཚང་མར་འབྲེལ་ལམ་བཟང་བ་སོགས་གང་གི་ཐད་ནས་འགོ་ཁྲིད་ཅིག་ལ་ཚང་དགོས་པའི་ཡོན་ཏན་ཕུན་སུམ་ཚོགས་པ་ཞིག་ཡིན་པར་ངེས་ཤེས་བརྟན་པོ་བྱུང་།
ཡེ་ཤེས་ཆོས་གྲགས།

བོད་མིའི་སྒྲིག་འཛུགས་ཀྱི་དྲུང་ཆེ་ཟུར་པ། སྦེལ་ལ་ཀོབ་སྦི། རྒྱ་གར།

ལྷག་བསམ་གངས་ལྟར་དཀར་ཞིང་།  བློ་སྤོབས་འབྲོང་དང་འདྲ་བའི་བཀའ་ཟུར་འབྲོང་ཆུང་དངོས་གྲུབ་སྲིད་སྐྱོང་ཁྲི་ལ་ཕེབས་རྒྱུར་སེམས་ཐག་བཅད་ཀྱིས་རྒྱབ་སྐྱོར་ཞུ་གི་ཡོད།
ཆབ་བྲག་ལྷ་མོ་སྐྱབས།

རྩོམ་པ་པོ་དང་། བོད་མི་མང་སྤྱི་ཟུར། ཕན་རན་སི་རྒྱལ་ཡོངས་ཤར་ཕྱོགས་སྐད་ཡིག་དང་རིག་གཞུང་སློབ་གྲྭ་ཆེན་མོའི་སློབ་དཔོན་ཟུར་པ། པའེ་རི་སི། ཕ་རན་སི།

མང་པོ་ཞིག་གི་བསམ་ཚུལ་ལྟར།  ད་ལྟའི་གནས་སྟངས་ལ་དགོངས་བཞེས་གནང་སྟེ་བཀའ་ཟུར་འབྲོང་ཆུང་དངོས་གྲུབ་ལགས་སྲིད་སྐྱོང་གི་འོས་མིར་བཞེང་རྒྱུར་རང་ཉིད་ནས་ལྷག་བསམ་རྣམ་དག་གིས་འབོད་བསྐུལ་ཞུ་བ་དང་ཆབས་ཅིག་མང་ཚོགས་ཀྱི་རེ་འདོད་གཞིར་བཟུང་ཁོང་ནས་ང་ཚོའི་ཐུན་མོང་གི་འཐབ་རྩོད་ལ་དོན་ཕན་ལྡན་པའི་ནུས་ཤུགས་སྤྲོད་རོགས་གནང་ཞུ་རྒྱུ་ཡིན། ང་ཚོའི་ངོས་ནས་རྒྱབ་སྐྱོར་ལྷོད་གཡེངས་སུ་མ་སོང་བ་ཞུ་གི་ཡིན།

ནོར་འཛིན་བདེ་སྐྱིད།

ཧར་ཝར་ཌི་གཙུག་ལག་སློབ་ཆེན་གྱི་སློབ་ཟུར་དང་། ཏཱ་ལའི་བླ་མ་མཐོ་སློབ་ཀྱི་སློབ་དཔོན་ཟུར་པ། ལྡི་ལི་གསར་པ། རྒྱ་གར།

འབྲོང་ཆུང་དངོས་གྲུབ་ལགས་ཀྱི་རང་བཞིན་ནི་རང་ཚུགས་ཟིན་པོ་དང་། སྨྲ་བ་ཉུང་ཉུང་། དོན་གནད་ཚང་མར་ཐུགས་སྣང་ཆེན་པོ། མི་མཐོ་དམན་ཀུན་ལ་མཐོང་ཆེན་དང་འབྲེལ་བ་འཛིན་མཁས་པོ་དང་། ཕྱི་ནང་གསང་བའི་ལས་དོན་ཁག་ཕྱི་གྱར་རྩ་བ་ནས་མེད་པར་དམ་འཛིན་གནང་ཐུབ་མཁན་ཞིག་ཡིན་སྟབས། བཙན་འབྱོལ་ནང་ཙམ་མ་ཟད། བོད་ནང་གི་བོད་མི་ཚོས་ཀྱང་ཁོང་ལ་ཡིད་ཆེས་དང་གུས་བཀུར་ཆེན་པོ་ཞུ་གི་ཡོད།

ཆུང་ཚེ་རིང་།

ཨོ་སི་ཀྲོ་ལི་ཡ་རྒྱལ་ཡོངས་གཙུག་ལག་སློབ་གྲྭ་ཆེན་མོའི་བོད་ཡིག་སློབ་དཔོན། སིར་ཎི། ཨོ་སི་ཀྲོ་ལི་ཡ།

མི་ལོ་བཞི་བཅུའི་རིང་ལབ་གླེང་མེད་པའི་ལྷག་བསམ་ཞབས་ཞུ་དེའི་ཉམས་མྱོང་གིས་ད་སྐབས་བཙན་བྱོལ་ནང་རྙོག་གླེང་ཕྲན་བུ་ཡོད་པ་རྩ་བ་བཅད་ཏེ་བརྟན་ལྷིང་གཅིག་བསྒྲིལ་གི་དབུ་འཁྲིད་ཐུབ་པའི་ནུས་པ་ཅན་དང་། བོད་ཕྱི་ནང་གཉིས་དབར་ཟམ་པ་བརྟན་པོ་འཛུགས་ཏེ་བདེན་མཐའ་གསལ་བའི་ནུས་པའང་བཀའ་ཟུར་འབྲོང་ཆུང་དངོས་གྲུབ་མཆོག་ལ་ཡོད།

འཇམ་དབྱངས་རྡོ་རྗེ།

འབྲས་ལྗོངས་མངའ་སྡེ་གཞུང་གི་ཟུང་སྦྲེལ་དྲུང་ཆེ་ཟུར་པ། འབྲས་ལྗོངས། རྒྱ་གར།

ང་ཚོའི་སྤྱི་ཚོགས་ཆུང་ཆུང་འདི་ཤོག་ཕྱོགས་སྒྲིལ་མེད་པར་མཐུན་སྒྲིལ་དམ་གཙང་ཡོང་བ་དང་། ཆོལ་གསུམ་བོད་རིགས་སྤུན་ཟླའི་འདུ་ཤེས་སྲ་བརྟན་གནས་ཐུབ་པ་ཡོང་ཆེད་ངས་བཀའ་ཟུར་འབྲོང་ཆུང་དངོས་གྲུབ་མཆོག་ ༢༠༢༡ ལོའི་སྲིད་སྐྱོང་ལ་རྒྱབ་སྐྱོར་ཞུ་བཞིན་ཡོད།

འཇིགས་མེད་པ་སངས།

བོད་མིའི་སྒྲིག་འཛུགས་ཀྱི་ཟུང་དྲུང་ཟུར་པ་དང་། དེ་སྔ་དམིགས་བསལ་སྐུ་ཚབ་བཀའ་ཟུར་རྒྱ་རི་བློ་གྲོས་རྒྱལ་མཚན་གྱིས་དབུ་འཁྲིད་པའི་འབྲེལ་མོལ་སྐུ་ཚབ་ཚོགས་པའི་ཚོགས་མི། ཁཱན་བྷི་ར། ཨོ་སི་ཀྲོ་ལི་ཡ།

འབྲོང་ཆུང་དངོས་གྲུབ་ལགས་ནི་བོད་ལ་དངོས་སུ་ཕེབས་ནས་བོད་ནང་ལོགས་ཀྱི་གནས་སྟངས་དང་། གཞིས་ལུས་བོད་མིའི་བསམ་བློ་གཏོང་སྟངས་མཁྱེན་རྟོགས་ཆ་ཚང་ཡོད་མཁན་ཞིག་ཡིན་པ་མ་ཟད།  ད་ལྟའི་བཙན་བྱོལ་སྤྱི་ཚོགས་འདི་བཞིན་ཆིག་སྒྲིལ་བཟོ་ཐུབ་རྒྱུར་ནུས་པ་འདོན་མཁན་གྱི་སྐྱེ་བོ་ཞིག་ཡིན་པར་མང་པོས་ངོས་འཛིན་གནང་གི་འདུག་པ་བཞིན་ང་རང་གིས་ཀྱང་དེ་ལྟར་མཐོང་གི་ཡོད་སྟབས།  ཁོང་ ༢༠༢༡ གི་སྲིད་སྐྱོང་ལ་རྒྱབ་སྐྱོར་ཞུ་གི་ཡོད།

དོན་གྲུབ་དབང་ཆེན།

ཆབ་སྲིད་བཙོན་ཟུར་དང་འཇིགས་བྲལ་གློག་བརྙན་བཟོ་མཁན། སན་ཕི་རན་སི་སི་ཁཱོ། ཨ་རི།

གུས་པ་བདེ་སྲུང་དུ་ལོ་དྲུག་དྲུང་ཆེའི་ལས་འགན་ཁུར་རིང་བཀའ་ཟུར་འབྲོང་ཆུང་དངོས་གྲུབ་ལགས་ཀྱི་བོད་ནང་གི་འབྲེལ་བ་དང་།  རྒྱ་གར་གཞུང་གི་གནད་ཡོད་མི་སྣའི་དབར་གྱི་འབྲེལ་བ་དེ་ཧང་སངས་དགོས་པ་ཞིག་ཡིན་པ་གཞི་ནས་ཤེས་རྟོགས་བྱུང་།

དབང་ཕྱུག་ཕ་ཟུར།

བོད་མིའི་སྒྲིག་འཛུགས་ཀྱི་དྲུང་ཆེ་ཟུར་པ། ཝན་ཁུ་ཝ། ཨ་རི།

གལ་ཏེ་ང་ཚོས། རྣམ་ཀུན་ ‘དོན་ཀྱི་བདག་པོ་གཞིས་བཞུགས་བོད་མི་དེ་དག་ཡིན།’ ཟེར་བ་དེ་ཁ་ཞེ་གཉིས་མེད་ཡིན་ན།  བཙན་བྱོལ་ནང་ཡོད་པའི་ཆབ་སྲིད་བཙོན་ཟུར་མང་ཆེ་བས་བཀའ་ཟུར་འབྲོང་ཆུང་དངོས་གྲུབ་ལགས་སུ་རྒྱབ་སྐྱོར་གནང་གི་ཡོད་པ་འདིས།  ང་ཚོར་ཏན་ཏན་བརྡ་ལན་ཞིག་གཏོང་གི་ཡོད་པས། དེའི་དོན་ངེས་པར་དུ་རྟོགས་པ་བྱེད་དགོས།

ཚེ་དབང་རིག་འཛིན།

ཀོ་ལམ་བི་ཡ་གཙུག་ལག་སློབ་ཁང་གི་མི་འབོར་ཞིབ་འཇུག་ལྟེ་གནས་ཁང་གི་ཉམས་ཞིབ་པ་དང་སྤྱི་ཚོགས་སྲིད་བྱུས་ཀྱི་འབུམ་རམས་པའི་སློབ་མ། ནིའུ་ཡོག ཨ་རི།

བཀའ་ཟུར་འབྲོང་ཆུང་དངོས་གྲུབ་མཆོག་གི་ཤེས་ཡོན་དང་།  ཉམས་མྱོང་།  འཇོན་ཐང་། ཆིག་སྒྲིལ་གྱི་གལ་ཆེའི་རང་བཞིན་རྟོགས་ཐུབ་མཁན།  བོད་ནང་བོད་ཕྱི་ལོགས་གཉིས་ཀ་ནས་ཡིད་ཆེས་ཡོད་སྟབས། ཕྱི་ལོ་ ༢༠༢༡ ལོའི་སྲིད་སྐྱོང་འོས་ཤོས་དང་འཚམས་ཤོས་ནི་བཀའ་ཟུར་འབྲོང་ཆུང་དངོས་གྲུབ་མཆོག་ཡིན།

ངམ་རིང་བློ་བཟང་བསྟན་དར།

བོད་ཁྱིམ་ཤེས་ཡོན་འཕེལ་རྒྱས་སྡེ་ཚན་གྱི་སློབ་དེབ་རྩོམ་སྒྲིག་དང་ཉམས་ཞིབ་པ་ཟུར་པ། སིར་ཎི། ཨོ་སི་ཀྲོ་ལི་ཡ།

བོད་མིའི་སྒྲིག་འཛུགས་ཀྱི་ལས་ཀྱི་སྣེ་མོ་བའི་ནང་བོད་མིའི་བཟང་སྤྱོད་སླར་གསོ་སླད་བཀའ་ཟུར་འབྲོང་ཆུང་དངོས་གྲུབ་ལྟ་བུ་བཟང་སྤྱོད་ཚད་ལྡན་དང་། ཉམས་མྱོང་ཕུལ་བྱུང་གི་སྐྱེ་བོ་ཞིག་ངེས་པར་དུ་སྲིད་སྐྱོང་ལ་འདེམས་ཐོན་དགོས་འདུག་པས་རྒྱབ་སྐྱོར་ཞུ་བཞིན་ཡོད།

སྐར་མ་ལྷ་མོ།

རྒྱ་གར་གཞུང་གི་ཚན་རིག་ལག་རྩལ་ཚན་པའི་ཞིབ་འཇུག་ལས་རོགས་ཟུར་པ། ཀ་ལི་ཕོ་ནི་ཡ། ཨ་རི།

ང་ཚོར་སྲིད་སྐྱོང་དུ་འོས་པ་འདྲ་འདྲའི་ནང་ནས་མི་འདྲ་བ་ཁག་ཅིག་ཡོད། གཅིག་ལས་གཅིག་ཡག་པས་གང་འདེམས་ཚོད་མི་ཐིག་པ་ལྟ་བུ་ཡོང་གི་འདུག བསམ་གྱིན་བསམ་གྱིན་དུས་ལ་བབས་པའི་སྲིད་སྐྱོང་དེ་བཀའ་ཟུར་འབྲོང་ཆུང་དངོས་གྲུབ་ལགས་རེད་འདོད། གཡག་ཞར་གྱིས་རྩྭ་ཟོས་པ་དང་འདྲ་བའི་རྟུལ་ཞུགས་འཛིན་པ་དེ་དག་ལ་གོ་བརྡ་འཕྲོད་ཨེ་ཡོང་སྙམ་པའི་རེ་བ་མེད། འོན་ཀྱང་། ཤེས་རབ་ཅན་གྱི་རང་རེའི་སྤུན་ཟླ་ཚོས་ངེས་པར་དུ་བསམ་གཞིག་གཏོང་དགོས་པའི་འགན་འཁྲི་ཐོལ་བ་ཞིག་ཡོད་ཅེས་ནན་སྐུལ་ཞུ་བཞིན་ཡོད།
དུར་བྱང་།

ཕུར་ཐི། ནུབ་ཨོ་སི་ཀྲོ་ལི་ཡ།

རང་ཉིད་རྒྱའི་བཙོན་དུ་ཚུད་སྐབས་ཞི་དྲག་རྣམ་འགྱུར་སྣ་ཚོགས་ཀྱི་ཐོག་ནས་འདྲི་ཞིབ་བྱེད་སྐབས་བཙན་བྱོལ་བོད་མིའི་ཁྲོད་ནས་གནས་ཡོད་མི་སྣ་གཉིས་ཀྱི་ཐད་བསྐྱར་འདྲི་ཡང་འདྲི་བྱས་པ་གཅིག་ནི་དཔལ་ལྡན་བདེ་སྲུང་བཀའ་ཟུར་འབྲོང་ཆུང་དངོས་གྲུབ་མཆོག་གི་སྐོར་ཡིན་པས། ཁོང་ནི་རྒྱ་ནག་གཞུང་གིས་དོ་སྣང་བྱེད་ཡུལ་དང་། འཇིགས་སྣང་སྐྱེ་ཡུལ་གྱི་གངས་ཅན་པའི་མི་སྣ་གལ་ཆེན་ཞིག་ཡིན་པ་ཤེས་རྟོགས་བྱུང་རྗེས་གུས་བཀུར་ཇེ་ཆེར་གྱུར།

ཐུབ་བསྟན་ཡར་འཕེལ།

རྣམ་གྲྭ་ཕན་བདེ་ལེགས་བཤད་གླིང་སློབ་གྲྭའི་སློབ་སྤྱི། རྡ་རམ་ས་ལ། རྒྱ་གར།

ངས་འདས་པའི་མི་ལོ་ ༣༠ ལྷག་རིང་འབྲོང་ཆུང་དངོས་གྲུབ་ལགས་དང་མཉམ་དུ་ལས་ཀ་བྱས་པའི་མྱོང་འཚོར་དུ།  ཁོང་ནི་རང་ཉིད་ཀྱི་མཚན་སྙན་ལ་མི་བལྟ་བར་ལས་དོན་ཐོག་དྲང་བདེན་དང་སྤྱི་དོན་ཁོ་ནར་དགོངས་བཞེས་གནང་མཁན་ཞིག་ཡིན་པ་དངོས་ར་འཕྲོད་པར་མ་ཟད། བོད་ནང་དུའང་དངོས་སུ་ཕེབས་ནས་གཞིས་བྱེས་དབར་ཟམ་པ་བཙུགས་མྱོང་བས་བོད་ནང་ཡོད་པའི་གནད་ཡོད་མི་སྣ་མང་པོས་ཡིད་ཆེས་ཆེན་པོ་བྱེད་ས་ཞིག་ཡིན།  ད་ལྟའི་དུས་ཀྱི་དགོས་མཁོར་གཞིགས་ན། ཁོང་ནི་བློས་འགེལ་ཆོག་པ་དང་སྤྱི་ཚོགས་ལ་དགོས་མཁོ་ཆེ་བའི་འགོ་ཁྲིད་ཞིག་ཏུ་ངོས་འཛིན་ཞུ་གི་ཡོད།

ཀུན་དགའ་བཀྲིས།

བོད་མིའི་སྒྲིག་འཛུགས་ཀྱི་དྲུང་ཆེ་ཟུར་པ་དང་རྒྱ་རིགས་འབྲེལ་མཐུད་པ་ཟུར་པ། ནིའུ་འཇར་སི། ཨ་རི།

གུས་མོས་ཁྱེད་ཐོག་མར་མཇལ་དུས་ཁྱེད་ནི་བབ་ལྷིང་དང་ལྡན་པའི་རང་བཞིན་བྱམས་བརྩེ་ཅན་གྱི་ཞལ་འཛུམ་བག་དང་ལྡན་པའི་དབུ་ཁྲིད་ཞིག་གིས་གུས་མོར་ངག་འཇམ་པོའི་སྒོ་ནས་བཀའ་འདྲི་བཀའ་སློབ་གནང་སྐབས། གུས་མོར་མཚོན་ན་ཚིག་ངན་དང་སྡང་མིག་གི་བཙན་པོ་དབང་ཡོད་ཀྱི་དཔོན་ངན་རིང་ལུགས་འོག་ནས་བྲལ་མ་ཐག་པའི་གུས་མོར་འཇིགས་སྣང་སྤུ་ཙམ་མེད་པར་དྲོ་སོབ་སོབ་ཀྱི་ཚོར་བ་ཞིག་གནང་བྱུང་།

ངག་དབང་གསང་གྲོལ།

ཆབ་སྲིད་བཙོན་ཟུར། སྦོ་སི་ཀྲོན། ཨ་རི།

བཀའ་ཟུར་འབྲོང་ཆུང་དངོས་གྲུབ་མཆོག་གི་མི་གཤིས་དྲང་ཚུགས་དང་། ལྷག་བསམ། འདས་པའི་མི་ལོ་ ༤༤ རིང་གི་ཉམས་མྱོང་། ལྷག་དོན་མཉམ་འཁྲིད་ཀྱི་ནུས་པ་དང་། དབུ་མའི་ལམ་གྱི་སྲིད་བྱུས་ལ་ངེས་པ་རྙེད་པའི་སྒོ་ནས་ལངས་ཕྱོགས་བརྟན་པོ་ཡོད་པ་བཅས་ལ་བརྟེན་ནས་ངས་ཁོང་༢༠༢༡ ལོའི་སྲིད་སྐྱོང་ལ་རྒྱབ་སྐྱོར་ཞུ་ཡི་ཡོད།

སྐལ་བཟང་ཚེ་རིང་།

བོད་མིའི་སྒྲིག་འཛུགས་ཀྱི་ཟུང་དྲུང་ཟུར་པ་དང་། དེ་སྔ་དམིགས་བསལ་སྐུ་ཚབ་བཀའ་ཟུར་རྒྱ་རི་བློ་གྲོས་རྒྱལ་མཚན་གྱིས་དབུ་འཁྲིད་པའི་འབྲེལ་མོལ་སྐུ་ཚབ་ཚོགས་པའི་ཚོགས་མི། ཁཱན་བྷི་ར། ཨོ་སི་ཀྲོ་ལི་ཡ།

འདས་པའི་མི་ལོ་ ༤༤ རིང་གཟེངས་སུ་ཐོན་པའི་ཞབས་ཞུ་གནང་སྐབས།  འབྲོང་ཆུང་དངོས་གྲུབ་མཆོག་གིས་ལྷག་བསམ་དང་དྲང་ཚུགས་ལ་ནམ་ཡང་གཡོ་ཟོལ་མེད་པ་གསལ་སྟོན་གནང་ཡོད།

ངག་དབང་ཕུན་ཚོགས།

ཀལ་ལི་ཕོ་ནི་ཡ་མངའ་སྡེའི་སློབ་ཆེན་གྱི་མཚན་འཛིན་དགེ་རྒན་ཆེན་མོ་དང་། གཞི་རིམ་དང་སྐད་གཉིས་སློབ་གསོ་ཚན་ཁག་གི་འགན་འཛིན་ཟུར་པ། ཀལ་ལི་ཕོ་ནི་ཡ། ཨ་རི།

བཀའ་ཟུར་འབྲོང་ཆུང་དངོས་གྲུབ་ལགས་ནི་བཟང་སྤྱོད་ལྡན་པའི་སྐྱེ་བོ་ཞིག་ཡིན་པ་དང་། ཁོང་གིས་བཙན་བྱོལ་བོད་མིའི་གནས་བབས་གང་འདྲ་ཡིན་མིན་མཁྱེན་རྟོགས་གཏིང་ཟབ་ཡོད་པ་ཙམ་དུ་མ་ཟད། བོད་ནང་གི་གནས་སྟངས་ལ་ཡང་ཐུགས་རྒྱུས་ཆེན་པོ་ཡོད། ཁོང་གིས་གནད་དོན་ཐག་གཅོད་གནང་སྟངས་དང་།  ལྷག་པར་དུ་རྩ་དོན་དང་འབྲེལ་བའི་གལ་གནད་ལ་གདོང་ལེན་གནང་སྟངས་མཁས་པ་སོགས་ཀྱི་དམིགས་བསལ་གྱི་ཁྱད་ཆོས་ཡོད་སྟབས་ངས་ ༢༠༢༡ ལོའི་སྲིད་སྐྱོང་ལ་རྒྱབ་སྐྱོར་ཞུ་བཞིན་ཡོད།

ནོར་བུ་ཚེ་རིང་ཆོས་རྫོང་།

ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པའི་ཚོགས་གཙོ་ཟུར་པ། ནིའུ་ཡོག ཨ་རི།

གུས་གཞས་པ་ངག་ཚེའི་སེམས་ནང་གི་མ་འོངས་དབུ་ཁྲིད་ནི་རྒན་འབྲོང་ཆུང་དངོས་གྲུབ་ལགས་ཡིན། དེར་བརྟེན་ངའི་གཞས་ཉན་མཁན་ཚང་མས་ཁོང་ལ་འོས་ཤོག་འཕེན་རོགས་ཞུ་གི་ཡོད།

གཙང་ངག་དབང་ཚེ་རིང་།

གཞས་པ། བལ་ཡུལ་མཆོད་རྟེན།

ཕྲན་ཝཎའི་འཛིན་སྐྱོང་ལས་བྱེད་ཡིན་སྐབས་སྐུ་ངོ་དང་མཉམ་འབྲེལ་བ་བྱུང་།  བརྒྱུད་རིམ་དེའི་ནང་སྐུ་ངོ་མཆོག  ཉམས་ཆུང་བག་ཡོད་ཚུལ་མཐུན་རྒྱུན་གྱི་སྤྱོད་པ་གསལ་ཞིང་།  མཐོ་དམའ་དྲག་ཞན་སུ་ལའང་ཉེ་རིང་མི་གནང་བའི་མི་གཤིས་མཆོག་ཏུ་གྱུར་བ།  ཆོལ་ཁ་དང་ལུང་ཚན་གྱི་ཞེན་ཁོག་དོར་ཏེ་སྤྱི་པ་གཙུག་ཏུ་འཛིན་མཁན།  ལྷག་པར་བོད་ཕྱི་ནང་གཉིས་ཀྱི་ནང་ཁོང་ལ་ཡིད་ཆེས་དང་རེ་བ་ཤུགས་ཆེན་པོ་གནང་གི་ཡོད། རྒྱུ་མཚན་དེར་བརྟེན་ཡོང་རྒྱུའི་  ༢༠༢༡  ཡི་སྲིད་སྐྱོང་དུ་སྐུ་ངོ་མཆོག་ལ་རྒྱབ་སྐྱོར་ཞུ་བཞིན་ཡོད།

བཀྲ་ཤིས་སྟོབས་རྒྱལ།

ཝཎ་ཆེས་མཐོའི་གཙུག་ལག་སློབ་གཉེར་ཁང་གི་ལས་བྱེད་ཟུར་པ། ཀྲོ་རོན་ཀྲོ། ཁེ་ཎ་ཌ།

བཀའ་ཟུར་འབྲོང་ཆུང་དངོས་གྲུབ་མཆོག་ནི་གུས་པས་ ༡༩༦༤ ལོར་ཐོག་མར་སློབ་ཕྲུག་སྐབས་ནས་བཀའ་བློན་བར་དཀྱིལ་འཁོར་གཅིག་ནང་གཤིབ་མྱོང་བའི་རྒྱུ་མཚན་ལ་བརྟེན་ནས་ཁོང་གི་ཐུགས་གཤིས་དང་གཟེངས་སུ་ཐོན་པའི་འགོ་ཁྲིད་ཀྱི་ནུས་པ་སོགས་ལ་ཐག་ཉེ་པོའི་སྒོ་ནས་རྒྱུས་མངའ་ཡོད།  དེར་བརྟེན་བབ་ལྷིང་བརྟན་གསུམ་སྒོ་ནས་ཆོལ་གསུམ་མཉམ་འཁྲིད་ཐུབ་པའི་སྲིད་སྐྱོང་ཞིག་འདེམས་ཐུབ་པའི་ཆེད་ངས་ཁོང་ལ་རྒྱབ་སྐྱོར་ཞུ་ཡི་ཡོད།

བསྟན་འཛིན་ཕུན་ཚོགས་ཨ་ཏི་ཤ།

བོད་མིའི་སྒྲིག་འཛུགས་ཀྱི་དྲུང་ཆེ་ཟུར་པ། ཁཱན་བྷི་ར། ཨོ་སི་ཀྲོ་ལི་ཡ།

 ངོ་དེབ། དབྱིན་སི་གྷ་རམ། འཕྲུལ་སྒྲ།  ཡུ་ཁྲུབ།