འབྲོང་ཆུང་དངོས་གྲུབ་ལགས་ནི་བོད་ལ་དངོས་སུ་ཕེབས་ནས་བོད་ནང་ལོགས་ཀྱི་གནས་སྟངས་དང་། གཞིས་ལུས་བོད་མིའི་བསམ་བློ་གཏོང་སྟངས་མཁྱེན་རྟོགས་ཆ་ཚང་ཡོད་མཁན་ཞིག་ཡིན་པ་མ་ཟད།  ད་ལྟའི་བཙན་བྱོལ་སྤྱི་ཚོགས་འདི་བཞིན་ཆིག་སྒྲིལ་བཟོ་ཐུབ་རྒྱུར་ནུས་པ་འདོན་མཁན་གྱི་སྐྱེ་བོ་ཞིག་ཡིན་པར་མང་པོས་ངོས་འཛིན་གནང་གི་འདུག་པ་བཞིན་ང་རང་གིས་ཀྱང་དེ་ལྟར་མཐོང་གི་ཡོད་སྟབས།  ཁོང་ ༢༠༢༡ གི་སྲིད་སྐྱོང་ལ་རྒྱབ་སྐྱོར་ཞུ་གི་ཡོད།

གུས་མོས་ཁྱེད་ཐོག་མར་མཇལ་དུས་ཁྱེད་ནི་བབ་ལྷིང་དང་ལྡན་པའི་རང་བཞིན་བྱམས་བརྩེ་ཅན་གྱི་ཞལ་འཛུམ་བག་དང་ལྡན་པའི་དབུ་ཁྲིད་ཞིག་གིས་གུས་མོར་ངག་འཇམ་པོའི་སྒོ་ནས་བཀའ་འདྲི་བཀའ་སློབ་གནང་སྐབས། གུས་མོར་མཚོན་ན་ཚིག་ངན་དང་སྡང་མིག་གི་བཙན་པོ་དབང་ཡོད་ཀྱི་དཔོན་ངན་རིང་ལུགས་འོག་ནས་བྲལ་མ་ཐག་པའི་གུས་མོར་འཇིགས་སྣང་སྤུ་ཙམ་མེད་པར་དྲོ་སོབ་སོབ་ཀྱི་ཚོར་བ་ཞིག་གནང་བྱུང་།

འབྲོང་ཆུང་དངོས་གྲུབ་ལགས་ཀྱི་རང་བཞིན་ནི་རང་ཚུགས་ཟིན་པོ་དང་། སྨྲ་བ་ཉུང་ཉུང་། དོན་གནད་ཚང་མར་ཐུགས་སྣང་ཆེན་པོ། མི་མཐོ་དམན་ཀུན་ལ་མཐོང་ཆེན་དང་འབྲེལ་བ་འཛིན་མཁས་པོ་དང་། ཕྱི་ནང་གསང་བའི་ལས་དོན་ཁག་ཕྱི་གྱར་རྩ་བ་ནས་མེད་པར་དམ་འཛིན་གནང་ཐུབ་མཁན་ཞིག་ཡིན་སྟབས། བཙན་འབྱོལ་ནང་ཙམ་མ་ཟད། བོད་ནང་གི་བོད་མི་ཚོས་ཀྱང་ཁོང་ལ་ཡིད་ཆེས་དང་གུས་བཀུར་ཆེན་པོ་ཞུ་གི་ཡོད།

གལ་ཏེ་ང་ཚོས། རྣམ་ཀུན་ ‘དོན་ཀྱི་བདག་པོ་གཞིས་བཞུགས་བོད་མི་དེ་དག་ཡིན།’ ཟེར་བ་དེ་ཁ་ཞེ་གཉིས་མེད་ཡིན་ན།  བཙན་བྱོལ་ནང་ཡོད་པའི་ཆབ་སྲིད་བཙོན་ཟུར་མང་ཆེ་བས་བཀའ་ཟུར་འབྲོང་ཆུང་དངོས་གྲུབ་ལགས་སུ་རྒྱབ་སྐྱོར་གནང་གི་ཡོད་པ་འདིས།  ང་ཚོར་ཏན་ཏན་བརྡ་ལན་ཞིག་གཏོང་གི་ཡོད་པས། དེའི་དོན་ངེས་པར་དུ་རྟོགས་པ་བྱེད་དགོས།

མི་ལོ་བཞི་བཅུའི་རིང་ལབ་གླེང་མེད་པའི་ལྷག་བསམ་ཞབས་ཞུ་དེའི་ཉམ་མྱོང་གིས་ད་སྐབས་བཙན་བྱོལ་ནང་རྙོག་གླེང་ཕྲན་བུ་ཡོད་པ་རྩ་བ་བཅད་ཏེ་བརྟན་ལྷིང་གཅིག་བསྒྲིལ་གི་དབུ་འཁྲིད་ཐུབ་པའི་ནུས་པ་ཅན་དང་། བོད་ཕྱི་ནང་གཉིས་དབར་ཟམ་པ་བརྟན་པོ་འཛུགས་ཏེ་བདེན་མཐའ་གསལ་བའི་ནུས་པའང་བཀའ་ཟུར་འབྲོང་ཆུང་དངོས་གྲུབ་མཆོག་ལ་ཡོད།

བོད་མིའི་སྒྲིག་འཛུགས་ཀྱི་ལས་ཀྱི་སྣེ་མོ་བའི་ནང་བོད་མིའི་བཟང་སྤྱོད་སླར་གསོ་སླད་བཀའ་ཟུར་འབྲོང་ཆུང་དངོས་གྲུབ་ལྟ་བུ་བཟང་སྤྱོད་ཚད་ལྡན་དང་། ཉམས་མྱོང་ཕུལ་བྱུང་གི་སྐྱེ་བོ་ཞིག་ངེས་པར་དུ་སྲིད་སྐྱོང་ལ་འདེམས་ཐོན་དགོས་འདུག་པས་རྒྱབ་སྐྱོར་ཞུ་བཞིན་ཡོད། 

འདས་པའི་མི་ལོ་ ༤༤ རིང་གཟེངས་སུ་ཐོན་པའི་ཞབས་ཞུ་གནང་སྐབས།  འབྲོང་ཆུང་དངོས་གྲུབ་མཆོག་གིས་ལྷག་བསམ་དང་དྲང་ཚུགས་ལ་ནམ་ཡང་གཡོ་ཟོལ་མེད་པ་གསལ་སྟོན་གནང་ཡོད།

བཀའ་ཟུར་འབྲོང་ཆུང་དངོས་གྲུབ་ནི་རྒྱ་ནག་དམར་གཞུང་གིས་ཀྱང་གནད་འགག་ཅན་གྱི་མི་སྣ་ཞིག་ལ་ངོས་འཛིན་བྱེད་བཞིན་པ་དང་། ཁོང་ནི་མ་ཤེས་ཤེས་མདོག་ཙམ་མིན་པར་བོད་ཕྱི་ནང་གཉིས་ལ་རྒྱུས་མངའ་ཆེ་ཤོས་ཀྱི་དབུ་ཁྲིད་ཅིག་ཡིན།