རྩོམ་པ་པོ། མདོ་སྨད་སྤྱི་ཟུར་གསེར་རྟ་ཚུལ་ཁྲིམས་འོད་ཟེར་ལགས།

[རྩོམ་ཡིག་འདི་ཉིས་སྟོང་བཅུ་དྲུག་ལོར་བྲིས་པའི་རྩོམ་རྙིང་ཞིག་ཡིན་ཀྱང་། ད་ལྟ་ཀློག་སྐབས་བྲོ་བ་མི་འདྲ་བ་ཞིག་འདུག]

རྩོམ་གྱི་ཡོང་ཁུངས། གསེར་རྟའི་དྲྭ་ཚིགས།

༄༅། །ན་མོ་གུ་རུ་མཉྫུ་ཤྲི་ཡེ། །
རབ༵་འབྱམས་རྒྱལ་བའི་བརྩེ་ཆེན་ཡེ་ཤེས་སྐུ། །
རབ༵་འབྱམས་གདུལ་བྱའི་མགོན་པོ་སྤྱན་རས་གཟིགས། །
རབ༵་འབྱམས་སྤྲུལ་བའི་སྒྱུ་འཕྲུལ་གངས་ཅན་མགོན། །
རབ༵་འབྱམས་བསྐལ་བརྒྱའི་བར་དུ་སྤྱི་བོས་མཆོད། །

མགོན་དེའི་ཐུགས་བསྐྱེད་ལས་འཁྲུངས་མི་རྗེ་མཆོག །
བདེ་སྲུང་བཀའ་བློན་འབྲོང་ཆུང་དངོས་གྲུབ་པའི། །
ཤེས་འཇོན་ལྷག་བསམ་ཡོན་ཏན་རྒྱ་མཚོ་ཆེའི། །
ཆ་ཤས་ཙམ་ཞིག་བརྗོད་ལ་སྤྲོ་བ་འཕེལ། །

༡༽ ཁོང་གི་བཅོས་མིན་གྱི་གཤིས་ཀ
དཔལ་ལྡན་མི་རྗེ་བདེ་སྲུང་བཀའ་བློན་འབྲོང་ཆུང་དངོས་གྲུབ་མཆོག་ནི་གུས་པའི་སེམས་གཏིང་ནས་ཆེས་ཤིན་ཏུ་རྩ་ཆེན་དུ་བརྩི་ཡུལ་གྱི་དཔལ་ལྡན་རང་གཞུང་གི་མི་སྣ་གལ་ཆེ་ཤོས་དེ་ཡིན། དེ་བཞིན་ངས་ནམ་རྒྱུན་སྐུ་ངོ་མཆོག་གང་ཏུ་མཇལ་ཡང་དེ་མ་ཐག་རང་ཉིད་ཀྱིས་རང་གི་ཀུན་སྤྱོད་ལ་ལྟ་རྟོག་རེ་བྱེད་དགོས་འབྱུང་བཞིན་འདུག

དངོས་གནས་བྱས་ན་ཁོང་ནི་མི་སྐྱ་ཞིག་ཡིན་པ་དང་། ང་ནི་གྲྭ་བ་ཞིག་ཡིན་པས། ཁོང་ལས་ལྷག་པའི་ང་ལ་ཀུན་སྤྱོད་ཡག་པོ་ཞིག་ཡོད་འོས་མོད། དེ་ལས་ལྡོག་ཏེ། ཁོང་ནི་མི་གཞི་བཟང་ཞིང་། ལྷན་སྐྱེས་ཀྱི་སྤྱོད་ལམ་བཟང་བའི་རྐྱེན་གྱིས་ངས་ཁོང་གང་དུ་མཇལ་ཡང་དེ་མ་ཐག་ཏུ་གུས་རང་ཉིད་ཀྱིས་རང་གི་སྤྱོད་ལམ་ལ་བརྟག་དཔྱད་རེ་མ་བྱས་ཐབས་མེད་བྱུང་།

དེ་ནི་ཁོང་རང་ཉིད་ཀྱི་བཅོས་མིན་ཡོན་ཏན་གྱི་སྟོབས་ཀྱིས་ངས་སེམས་གཏིང་ནས་ཁོང་གལ་ཆེན་དུ་རྩི་དགོས་པ་འདི་བྱུང་བ་རེད།

ཁོང་ནི་བོད་ཧིན་ཨིན་གསུམ་ལ་བྱང་ཆུབ་ཅིང་། ལྷག་བསམ་རྣམ་དག་གིས་མི་ལོ་བཞི་བཅུའི་རིང་༸སྐུ་བྱའི་སྲུང་སྐྱོབ་སོགས་ཀྱིས་གཙོས་རང་རེའི་སྤྱི་ཚོགས་ལ་གཟེངས་སུ་ཐོན་པའི་ཞབས་འདེགས་བླ་ན་མེད་པ་བསྒྲུབས་པའི་སྤྱི་ཚོགས་ཀྱི་ཉམས་མྱོང་གི་རྒྱ་མཚོར་གྱུར་ཅིང་། ཆོས་སྲིད་གཉིས་ལ་མཁྱེན་རྒྱ་ཡངས་པའི་འཇོན་ཐང་ཅན་གྱི་དབུ་ཁྲིད་བཟང་པོ་ཁོང་གིས་རང་ཅག་གི་དཔྲལ་བའི་མིག་དང་། ཁོག་པའི་སྙིང་གཅིག་པུ་སྤྱི་ནོར་༸གོང་ས་༸སྐྱབས་མགོན་ཡིད་བཞིན་ནོར་བུའི་བཀའ་དྲིན་མཁྱེན་པའི་སྒོ་ནས་རླབས་ཆེན་བཀའ་དགོངས་འོག་ཤར་བསྐྱོད་ཀྱིས་ཁྲིམས་དང་སྒྲིག་གཞིའི་དགོངས་དོན་ལ་ཟུར་ཙམ་ཡང་འགལ་མི་བཅུག་པར་མ་ཟད། ཆེ་འདོད་དྲེགས་འདོད་ཅི་ཡང་མེད་པར་རང་ཉིད་ནི་སྤྱི་ཚོགས་དང་། མི་མང་གི་ཞབས་ཕྱི་བ་ཞིག་ཡིན་པའི་འདུ་ཤེས་ཀྱིས་མཐོ་དམན་བར་གསུམ་མི་མང་ཚང་མ་ལ་འདྲ་མཉམ་གྱི་གཟིགས་སྟངས་གཅིག་མཚུངས་སུ་གནང་རྒྱུ་མ་གཏོགས། ཆོལ་ཁ་དང་ཆོས་ལུགས། གསར་འབྱོར་དང་། རྙིང་འབྱོར་སོགས་ཀྱི་ཕྱོགས་རིས་དབྱེ་འབྱེད་ཅི་ཡང་མེད་པར་ཀུན་ལ་ཕན་གང་ཐོགས་གནང་བཞིན་པ་སོགས་ནི་ཁོང་གི་བཅོས་མིན་གྱི་གཤིས་ཀ་རེད།

༢༽ ཉིན་མཚན་ཁྱད་མེད་དུ་སྤྱི་དོན་ལ་ཧུར་བརྩོན།
སྤྱིར་བཏང་ནས་དེང་སྐབས་འཛམ་གླིང་འདིར་ལས་བྱེད་ཆེ་ཕྲ་སྤྱི་དང་། ལྷག་ཏུ་དབུས་བོད་མིའི་སྒྲིག་འཛུགས་ལ་མཚོན་ན་ལས་བྱེད་རྣམས་ཞོགས་པའི་ཆུ་ཚོད་༩་༣༠་ཙམ་ལ་ལས་ཁུངས་སུ་འབྱོར་རྒྱུ་དང་། དགོང་མོའི་ཆུ་ཚོད་༥་པ་ཙམ་ལ་ལས་ཁུངས་གྲོལ་རྒྱུ་ནི་རྒྱུན་ལྡན་ཡིན་ཡང་། བདེ་སྲུང་བཀའ་བློན་སྐུ་ངོ་འབྲོང་ཆུང་དངོས་གྲུབ་མཆོག་ལ་མཚོན་ན་ཞོགས་པར་ཆུ་ཚོད་༧་པ་ཡས་མས་ནས་དང་། དེ་བཞིན་ལས་ཁུངས་གྲོལ་རྗེས་མཚམས་རེར་མཚན་མོའི་ཆུ་ཚོད་༡༠་པ་ཙམ་བར་གཙོ་ཆེ་བ་བཙན་འོག་ནས་ཡོང་ཞིང་སླར་ཡང་བཙན་འོག་ཏུ་འགྲུལ་བསྐྱོད་དགོས་པའི་རང་རིགས་གནད་ཡོད་གང་མང་གི་རེ་བསྐུལ་ཞིབ་གསན་གནང་རྒྱུ་དང་། ལུགས་གཉིས་ཀྱི་སློབ་སྟོན་སོགས་རེ་བ་དོན་ལྡན་སྐོང་ཆེད་དང་། དེ་ཡང་ཁོང་ཚོའི་བདེ་འཇགས་སོགས་ལའང་དགོངས་པ་རྒྱ་ཆེ་བཞེས་ཀྱིས་གངས་སྐྱིད་བདེ་སྲུང་ལས་ཁུངས་གཅིག་པུ་མིན་པར་སྟབས་གང་བདེར་གཟིགས་ཞིབ་ཀྱིས་ཟུར་མཇལ་གནང་བཞིན་ཡོད་པ་སོགས་འདི་རིགས་ནི་ཕྱི་རབས་པ་ཚོས་མིག་དཔེར་ལེན་དགོས་ངེས་ཡིན།

དེ་ལས་ཀྱང་ཆེས་ཤིན་ཏུ་ཡིད་དབང་ཕྲོགས་ནུས་ཀྱི་ཁོང་གི་མཛད་བཟང་ཞིག་ནི་ཐག་ཉེ་རིང་དང་ངོ་ཤེས་མིན་སོགས་ལ་ལྟོས་པ་མེད་པར་མི་སུ་ཞིག་གིས་ཐད་ཀར་བདེ་སྲུང་བཀའ་བློན་སྐུ་ངོ་འབྲོང་ཆུང་དངོས་གྲུབ་མཆོག་ལ་ཞལ་པར་ཕུལ་གྱང་ཁོང་གིས་ཀྱང་ཉིན་མཚན་དང་། གུང་གསེང་ཡིན་མིན་ལ་ལྟོས་མེད་ཀྱིས་འཕྲལ་དུ་ཞལ་པར་བླངས་ཏེ། གང་ལ་ཅི་འོས་ཀྱི་ལན་གསལ་དང་། སློབ་སྟོན་སོགས་གནང་བཞིན་པ་དེ་རེད།
སྤྱིར་ཁ་དཔར་ནི་མི་དང་མིའི་བར་ལ་སྐད་ཆ་སྐྱེལ་བྱེད་ཅིག་ཡིན་མོད། དེང་སྐབས་རང་རེའི་སྤྱི་ཚོགས་ནང་གི་དཔོན་རིགས་འགའ་རེར་མཚོན་ན་ལས་ཀ་མགོ་མ་བཙུགས་གོང་དང་། ལས་ཁུངས་གྲོལ་རྗེས་ནས་གང་ཟག་གཞན་ཞིག་འཆི་བའི་སྲོག་ལ་ཐུག་ནས་ཁ་དཔར་བཏང་ཡང་མི་ལེན་པ་དང་། དེ་བཞིན་གུང་སེང་ནམ་ཡིན་ལ་གུང་གསེང་ལ་བསྙད་ནས་རྒྱུན་ལྡན་གྱི་ཁ་དཔར་སྒོ་རྒྱག་བཞིན་པ་སོགས་ཆེས་མ་རབས་ཐ་ཤལ་གྱི་བྱ་ངན་ཡིན་པས། མ་རབས་ཀྱི་བྱ་ངན་དེ་རིགས་སྤྱི་ཚོགས་ནང་ཁྱབ་བརྡལ་འགྲོ་ཉེན་ཆེ་བས། ལས་བྱེད་འདི་རིགས་ཀྱི་མིང་བཅས་ཐེར་འདོན་བྱ་དགོས་ཀྱང་དེ་རིང་སྐབས་སུ་མ་བབ།

མཚམས་འདིར་ཀློག་མཁན་ཚོས་ཞིབ་ཏུ་གོང་གསལ་བདེ་སྲུང་བཀའ་བློན་སྐུ་ངོ་འབྲོང་ཆུང་དངོས་གྲུབ་མཆོག་གི་ཕྱག་ལས་གནང་སྟངས་ལ་བསམ་བློ་ཞིག་ཐོངས་དང་། མི་ལོ་བཞི་བཅུའི་རིང་ཉིན་གཅིག་ལྟར་རྒྱུན་ལྡན་འདི་ལྟར་སྤྱི་ཚོགས་ལ་ཞབས་འདེགས་སྒྲུབ་མཁན་གྱི་དབུ་ཁྲིད་ཅིག་བཙན་བྱོལ་བོད་གཞུང་ཙམ་དུ་མ་ཟད་འཛམ་གླིང་འདིར་དཀོན་ཚོད་དུ་འདུག་པས་ཁོང་ལྟ་བུའི་དབུ་ཁྲིད་ནི་༸སྤྱི་ནོར་༸གོང་ས་༸སྐྱབས་མགོན་ཡིད་བཞིན་ནོར་བུའི་ཐུགས་བསྐྱེད་སྨོན་ལམ་གྱི་མཐུ་ལས་བྱུང་བར་ངེས་སོ། །

༣༽ ཁོང་བདེ་སྲུང་བཀའ་བློན་དུ་མཚན་འདོན་གནང་སྐབས་གུས་པའི་སེམས་ཚོར།
ཕྱི་ལོ་༢༠༠༧་ཕྱི་ཟླ་༣་པའི་ནང་བོད་མི་མང་སྤྱི་འཐུས་གྲོས་ཚོགས་ནང་སྐབས་དེའི་བཀའ་བློན་ཁྲི་བ་སྐྱབས་རྗེ་མཁས་དབང་ཟམ་གདོང་རིན་པོ་ཆེས་ཁོང་གི་ཕྱག་རོགས་སུ་སྐབས་དེའི་བདེ་སྲུང་དྲུང་ཆེ་འབྲོང་ཆུང་དངོས་གྲུབ་མཆོག་ལ་བདེ་སྲུང་བཀའ་བློན་གྱི་འོས་ཆོས་ཚང་ངེས་ཡིན། ཅེས་གྲོས་ཚོགས་ནས་རྒྱབ་སྐྱོར་འབྱུང་ཆེད་ཁྱབ་བསྒྲགས་གནང་བྱུང་། སྐབས་དེར་ཕྲན་སྐབས་བཅུ་བཞི་བའི་གྲོས་ཚོགས་འཐུས་མི་ཡིན་པ་དང་། གུས་པ་ཧ་ཅང་བློ་ཕམ་ཆེན་པོ་དང་བཅས་ཏེ། ཁོང་བདེ་སྲུང་བཀའ་བློན་ལ་ཕེབས་རྒྱུར་བཀག་དགོས་དྲན་སོང་། དེའི་རྒྱུ་མཚན་ནི་བདེ་སྲུང་བཀའ་བློན་ལ་ཁོང་ལས་ལྷག་པའི་ཤེས་འཇོན་ཉམས་མྱོང་ལྷག་བསམ་སོགས་ཕུན་སུམ་ཚོགས་པ་ཞིག་ཕེབས་རྒྱུ་མེད་པ་ཕྲན་གྱིས་ཤེས་བཞིན་པ་ཡིན་མོད། སྐབས་དེར་བཀའ་ཁྲི་རིན་པོ་ཆེས་ཁོང་བདེ་སྲུང་བཀའ་བློན་དུ་མཚན་འདོན་གནང་བ་དེ་སྔ་དྲགས་པ་ཞིག་དང་། དེ་ལ་ང་ཚོས་རྒྱབ་སྐྱོར་བྱེད་རྒྱུ་དེ་ཡང་སྔ་དྲག་པར་ཕྲན་གྱིས་ངོས་འཛིན་བྱས་པ་ཡིན། དེའི་རྒྱུ་མཚན་ནི་སྐབས་དེར་་ཁོང་བཀའ་བློན་དུ་ཕེབས་ན་དེ་ནས་བཟུང་བསྟུད་མར་བཀའ་བློན་ཐེངས་གཉིས་ལ་ཕེབས་ངེས་ཡིན་པའང་ཕྲན་གྱིས་ཐག་གཅད་ནུས། བཀའ་བློན་བསྟུད་མར་ཐེངས་གཉིས་ཀྱི་ཡུན་ཚད་དེ་ལོ་བཅུ་ཡིན་པས། ལོ་བཅུ་ཚང་ནས་སླར་ཡང་མུ་མཐུད་བཀའ་བློན་གནང་རྒྱུ་མེད་པ་ང་ཚོའི་བཅའ་ཁྲིམས་ནང་འཁོད་ཡོད་ཕྱིར། ལོ་བཅུའི་རྗེས་ནས་ང་ཚོའི་ཆེས་ཤིན་དུ་གལ་ཆེ་བའི་༸གོང་ས་མཆོག་གི་སྐུ་བྱའི་སྲུང་སྐྱོབས་དང་། བོད་ཕྱི་ནང་བར་ལ་འབྲེལ་ལམ་སོགས་ཕྱོགས་ཡོངས་དང་འབྲེལ་བའི་བདེ་སྲུང་ལས་ཁུངས་ནས་ཁོང་འཁྱོལ་འགྲོ་ངེས་ཡིན་པས། དེ་ནི་ང་ཚོའི་གྱོང་གུད་ཆེ་ཤོས་ཤིག་རེད། དེ་ལས་ད་དུང་ཁོང་གི་དགོང་ནའི་བབ་སོགས་གང་ཐད་ནས་མུ་མཐུད་བདེ་སྲུང་དྲུང་ཆེའི་འགན་ཁུར་བཞེས་ཏེ། ནམ་ཞིག་རྒས་ཡོལ་ལ་ཕེབས་པའི་མཚམས་ཏག་ཏག་དེར་ཁོང་བདེ་སྲུང་བཀའ་བློན་དུ་བཞེངས་ན་ཁོང་གིས་ཤེས་འཇོན་ལྷག་བསམ་ཉམས་མྱོང་བཅས་ལ་ང་ཚོས་དུས་ཡུན་རིང་པོ་ཞིག་ཏུ་ལོངས་སྤྱོད་ཐུབ་ངེས་ཡིན་པ་ཕྲན་གྱིས་དྲན་བྱུང་།

འོན་ཀྱང་སྐབས་དེར་ཡང་ཕྱོགས་གཞན་ཞིག་ནས་བསམ་བློ་བཏང་སྐབས་ཁོང་གིས་ལོ་མང་རིང་སྤྱི་དོན་ལ་ཞབས་ཞུ་ཧུར་བརྩོན་གནང་ནས་དེ་རིང་གྲོས་ཚོགས་ནང་བཀའ་བློན་ལ་མཚན་འདོན་གནང་སྐབས་དེ་ལ་བཀག་འགོག་བྱས་ན། ཧ་ཅང་མ་འོས་པ་ཞིག་རེད་སྙམ་བྱུང་། དཔེར་ན་དེ་སྔོན་ལྷག་བསམ་ཤེས་འཇོན་ཅན་གྱི་མི་སྣ་ཚད་ལྡན་གྲོས་ཚོགས་ནང་བཀའ་བློན་ལ་མཚན་འདོན་གནང་སྐབས་བསམ་མེད་སྤྱི་འཐུས་རེ་ཟུང་གིས་གོ་དབང་ཕྱིན་ཅི་ལོག་ཏུ་བེད་སྤྱོད་བཏང་སྟེ། བཀག་པ་ལྟར། ཁོང་ཚོས་ལོ་མང་རིང་སྤྱི་དོན་བསྒྲུབས་པར་བཀའ་དྲིན་རྗེས་དྲན་ཞུ་རྒྱུའི་ཚབ་ལ་དྲིན་ལན་ལོག་འཇལ་དུ་མི་འགྲོ་བའི་ངེས་པའང་མི་འདུག་སྙམ་ནས་མཐར་ཁོང་བདེ་སྲུང་བཀའ་བློན་ལ་ཕེབས་པ་ཕྲན་གྱིས་བཀག་ནུས་མ་སོང་ལ། ཁོང་ལ་དགག་པ་བྱེད་མཁན་གཞན་ཡང་སུ་གཅིག་མེད་པར་གྲོས་ཚོགས་སྤྱི་མོས་ཀྱིས་ཁོང་བདེ་སྲུང་བཀའ་བློན་ལ་ཕེབས་པ་རེད། འོན་ཀྱང་གུས་པས་བདེ་སྲུང་ལས་ཁུངས་ཀྱི་མ་འོངས་པའི་སྐོར་ལ་བསམ་བློ་རེ་བཏང་སྐབས་དེ་ནས་བཟུང་བློ་བདེ་མ་བྱུང་།

༤༽ བདེ་སྲུང་བཀའ་བློན་དགོངས་ཞུའི་གནས་ཚུལ་ཐོས་པ།
ཕྱི་ལོ་༢༠༡༦་ལོའི་ཟླ་༤་ཚེས་༦་ཉིན་གྱི་ཕྱི་དྲོའི་ཆུ་ཚོད་དང་པོ་ཙམ་ལ་གྲོགས་པོ་ཞིག་གིས་ཧ་ཅང་ཐུགས་ཕམ་ཆེན་པོའི་རྣམ་པས་དེ་རིང་ཞོགས་པར་སྐུ་ངོ་བདེ་སྲུང་བཀའ་བློན་གྱིས་དགོངས་པ་ཞུས་འདུག ཅེས་གསུང་བྱུང་བ་དང་། དེ་ནས་ཆུ་ཚོད་ཁ་ཤས་རྗེས་ནས་སྐུ་ངོ་མཆོག་ལ་གསར་འགོད་པས་དངོས་སུ་བཅར་འདྲི་ཞུས་པར་བཀའ་ལན་གནང་བ་སོགས་དྲ་ལམ་ནས་དངོས་སུ་མཇལ་སྐབས་ཁོང་གིས་དགོངས་པ་ཞུ་དགོས་པའི་རྒྱུ་མཚན་གཙོ་བོ་ཉེ་ལམ་སྨན་རྩིས་ཁང་གི་མཛོད་སྒོའི་ཐོག་༧སྐྱབས་མགོན་རིན་པོ་ཆེ་མཆོག་གིས་བཀའ་ལྕི་མོ་ཞེ་དྲགས་ཕེབས་པ་དེ་དང་། དེ་བཞིན་ཉེ་ཆར་གྲོས་ཚོགས་གྲོལ་སྐབས་གཏང་རག་སྤྱན་འདྲེན་ཞུ་སྐབས་ཆོས་སྐྱོང་ཚོས་ཀྱང་བཀའ་ལུང་ལྕི་མོ་ཞེ་དྲགས་ཕེབས་པ་དེ་འདྲར་བརྟེན་ཏེ། འགན་འཁུར་མ་ཐུབ་པས་བཟང་སྤྱོད་ཀྱི་ཐོག་ནས་རང་ཐག་རང་གཅོད་ཀྱིས་དགོངས་པ་ཞུས་སྐོར་སོགས་གསུངས་བྱུང་སྐབས། གུས་པས་སེམས་ལ་ཡ་རབས་ཚུལ་མཐུན་གྱི་གཤིས་ཀ་རང་ཆས་སུ་མངའ་བའི་རླབས་ཆེན་གྱི་མི་བུ་ཁོང་གིས་ཡུལ་གོང་མ་བཀུར་ཤེས་དང་། འོག་མ་སྐྱོང་ཤེས་ཀྱི་སྒོ་ནས་སླར་ཡང་གཟི་བརྗིད་ལྡན་པའི་ལས་དོན་རླབས་པོ་ཆེ་ཞིག་བསྒྲུབས་གནང་འདུག་སྙམ་ཚེ་ཡིད་སྨོན་ཤུགས་དྲག་པོ་ཞིག་སྐྱེས་བྱུང་བ་དང་ཆབས་ཅིག་འབྱུང་འགྱུར་བདེ་སྲུང་ལས་ཁུངས་ལ་འཁྲི་བའི་ལས་དོན་གལ་ཆེན་དེ་རིགས་དེ་སྔོན་ལྟར་འཐུས་ཚང་བསྒྲུབ་ཐུབ་མིན་ལ་བསམ་སྐབས་སྔ་མའི་སེམས་ཁྲལ་དེ་སླར་ཡང་སླེབས་སོང་།

༥༽ གང་ལྟར་ཆེས་ཤིན་ཏུ་བཀུར་བར་འོས་པའི་བདེ་སྲུང་བཀའ་བློན་སྐུ་ངོ་འབྲོང་ཆུང་དངོས་གྲུབ་མཆོག་བདེ་སྲུང་བཀའ་བློན་དུ་ཕེབས་ཉིན་ནས་ང་ལ་ནི་བློ་ཕམ་ཚད་མེད་པ་བྱུང་ཟིན་མོད། འོན་ཀྱང་ད་ནས་འདས་དོན་ལ་རྟག་ཏུ་བློ་ཕམ་བྱས་བསྡད་པ་ཙམ་གྱིས་ཅི་ཡང་ཐོབ་རྒྱུ་མེད་ཕྱིར། ད་ནས་ང་ཚོ་ཚང་མས་མནོ་བསམ་ཞིབ་ཏུ་གཏང་དགོས་ས་དེ་ནི་ད་བར་སྐུ་ངོ་བཀའ་བློན་མཆོག་གིས་བསྒྲུབས་གནང་བའི་རང་གཞུང་བདེ་སྲུང་ལས་ཁུངས་ཀྱི་རླབས་ཆེན་ཕྱག་ལས་ཆེ་འབྲིང་ཆུང་གསུམ་དེ་དག་མུ་མཐུད་འཐུས་ཤོག་མེད་པར་རྒྱུན་འཁྱོངས་ཐུབ་པ་དང་། ལྷག་ཏུ་སྤྱི་ནོར་༸གོང་ས་༸སྐྱབས་མགོན་ཡིད་བཞིན་ནོར་བུས་སྐུ་ངལ་བརྒྱ་ཕྲག་གི་ལམ་ནས་དུས་ཡུན་རིང་པོར་ཆོལ་གསུམ་ཆོས་བརྒྱུད་བཅས་འཆམས་མཐུན་སོགས་མེད་པ་ནས་ཡོད་པ་དང་། ཡོད་་པ་ནས་སྤྱི་ཚོགས་ཡར་རྒྱས་སོགས་འདི་འདྲ་ཞིག་བསྐྲུན་གནང་པའི་རླབས་ཆེན་གྱི་མཛད་རྗེས་དེ་དག་ད་ནས་ཐལ་བའི་རྡུལ་དུ་གཏོར་བརླག་མི་གཏོང་མཁན། དཔེར་ན་སྐུ་ངོ་འབྲོང་ཆུང་དངོས་གྲུབ་ལྟ་བུའི་ཤེས་འཇོན་ལྷག་བསམ་ཉམས་མྱོང་སོགས་ཀྱིས་ཕྱུག་པའི་ཀུན་སྙོམས་ཉི་མ་ལྟ་བུའི་དབུ་ཁྲིད་བཟང་པོ་གང་མང་མ་འོངས་པར་མུ་མཐུད་ནས་འབྱུང་ཕྱིར་དུ་རང་རེས་ལས་གང་ཞིག་བརྩམས་དགོས་དང་། བདེ་སྲུང་བཀའ་བློན་འབྲོང་ཆུང་དངོས་གྲུབ་མཆོག་གི་ཤེས་འཇོན་ལྷག་བསམ་ཉམས་མྱོང་བཅས་རང་རེའི་སྤྱི་ཚོགས་ལ་སླར་ཡང་ཕན་རླབས་ཆེ་བ་གང་ཞིག་ལ་བེད་སྤྱོད་གཏང་དགོས་པ་སོགས་ནི་ད་ནས་ཕྲན་གྱིས་ཀྱང་མནོ་བསམ་གཏང་ས་གཙོ་བོ་དེ་ཡིན་ནོ།། །།

༦༽ མཇུག་བསྡུའི་གཏམ། སྨྲས་པ།
ས༵་ལའི་ལྗོངས་ཀྱི་རང་དབང་བདེན་དོན་ཕྱིར། །
ས༵་གསུམ་རེ་སྐོང་པད་དཀར་འཆང་བའི་སྡེས། །
ས༵་མཐའ་འདིར་བསྐྲུན་མང་གཙོའི་སྒྲིག་འཛུགས་ལ། །
ས༵་ཆེན་དབང་བསྒྱུར་སྟོབས་འབྱོར་འཕེལ་གྱུར་ཅིག །

ཕྱག་ན་པདྨོའི་རླབས་ཆེན་ལམ་སྟོན་མཆོ༵ག །
མཆོ༵ག་ཏུ་རྟོགས་ནུས་ཤེས་འཇོན་ལྷག་བསམ་གཏེ༵ར། །
གཏེ༵ར་ཆེན་གཡང་འཁོར་བཀའ་སྤྱིའི་ལས་སྣེའི་དཔུ༵ང་། །
དཔུ༵ང་ཆེན་བཙན་པོས་དགྲ་སྡེ་འདུལ་ནུས་ཤོག །

བདེ༵་སྲུང་བཀའ་བློན་འབྲོང་ཆུང་དངོས་གྲུབ་ལྟར། །
བདེ༵་འཇགས་སྲུང་སྐྱོབ་སྐུ་བྱའི་ལས་དོན་སོགས། །
བདེ༵་སྐྱིད་འབྱུང་གནས་འཐུས་ཚང་སྒྲུབ་པ་པོས། །
བདེ༵་སྲུང་ལས་ཁུངས་རྟག་ཏུ་སྐྱོང་བར་ཤོག །

ཅེས་བཀུར་འོས་སྐུ་ངོ་མཆོག་གིས་ད་བར་མི་ལོ་ཧྲིལ་བོ་༤༠་རིང་ལ་རང་རེའི་སྤྱི་ཚོགས་ལ་རླབས་ཆེན་དོན་ལྡན་གྱི་ཞབས་འདེགས་གང་མང་བསྒྲུབས་གནང་བར་བརྟེན་བཀའ་དྲིན་མཚོན་བྱེད་ཙམ་དུ་སྤྱི་ཟུར་གསེར་རྟའི་ཚུལ་ཁྲིམས་འོད་ཟེར་རམ། ཚངས་སྲས་རིག་པའི་འདོད་འཇོས་ཕྱི་ལོ་༢༠༡༦་ཟླ་༤་ཚེས་༡༠་ཉིན་གདན་ས་ཆེན་པོ་དགའ་ལྡན་གྱི་རང་ཤག་ལྔ་རིག་དྲི་བསུང་སྤོས་ངད་ལྡང་ཁང་དུ་སྦྱར་བའོ།།སརྦ་མངྒ་ལཾ། །